सभामुख घिमिरेले सहकारी ठगीका विषयमा शीर्ष चार दलसँग छलफल गर्दै
-आस्था न्यूज
चैत २६, २०८० काठमाडौं ।
सभामुख देवराज घिमिरेले सहकारी ठगीका सन्दर्भमा छलफल गर्न प्रमुख चार दलका शीर्ष नेतालाई बोलाएका छन्। प्रमुख प्रतिपक्षी दल नेपाली कांग्रेसले सहकारी ठगीका विषयमा आवाज उठाएपछि सभामुखले छलफलका लागि बोलाएका हुन्।
सहकारी ठगी प्रकरणमा उपप्रधानमन्त्री एवं गृहमन्त्री रवि लामिछानेका सन्दर्भमा नेपाली कांग्रेसले संसदीय छानबिन समिति गठनको मागसहित सदन चल्न नदिने अल्टिमेटम दिएको छ।
सभामुख घिमिरेले सोमबार बिहान साढे १० बजे आफ्नै कार्यकक्ष सिंहदरबारमा शीर्ष नेतालाई छलफलका लागि बोलाएको सभामुखका प्रेस सल्लाहकार शेखर अधिकारीले जानकारी दिए। माओवादी केन्द्रका अध्यक्ष पुष्पकमल दाहाल प्रचण्ड, प्रमुख प्रतिपक्षी दलका नेता शेरबहादुर देउवा, नेकपा एमालेका अध्यक्ष केपी शर्मा ओली र रास्वपाका सभापति रवि लामिछानेलाई छलफलका लागि बोलाइएको छ।
गत २१ गतेको प्रतिनिधि सभा बैठकमा नेपाली कांग्रेसले अर्को बैठकमा छानबिन समिति गठन नभए संसद् ठप्प पार्ने अल्टिमेटम दिएको थियो। कांग्रेसले विगत एक महिनायता निरन्तर लामिछानेमाथि प्रश्न उठाउँदै आएको छ।
