गर्मीले भारतको राजस्थानमा ६ जनाको मृत्यु
-आस्था न्यूज
जेठ १६, २०८१ काठमाडौं ।
पश्चिमी भारतीय राज्य राजस्थानमा भीषण गर्मीका कारण छ जनाको मृत्यु भएको छ ।
राज्यमा तापक्रम ४९ डिग्री सेल्सियस पुगेपछि मानिसहरुको मृत्यु भएको खबर सार्वजनिक भएको हो । राजस्थानका लगभग सबै ठाउँमा ४५ डिग्री सेल्सियसभन्दा बढी तापक्रम मापन गरिएको छ । स्थानीय सरकारले गर्मी मौसममा सावधानी अपनाउन सर्वसाधारणलाई आग्रह गरेको छ ।
राजस्थानमा ‘हिट स्ट्रोक’ बिरामीहरूको सङ्ख्या दुई हजार आठ सय नौबाट बढेर तीन हजार छ सय २२ पुगेको छ । मौसम विभागले पहिले नै मानिसहरूलाई गर्मीको जोखिमबाट बँच्न र चिसो ठाउँमा बस्न सुझाव दिएको छ । विभागले तिर्खा नलागे पनि पर्याप्त पानी पिएर ‘हाइड्रेटेड’ रहन आग्रह गरेको छ ।
भारतका ठूलो क्षेत्र हाल गर्मीको लहरको चपेटामा छ । यसबाट मानिसहरूको स्वास्थ्य र जीविकोपार्जनमा गम्भीर असर पारेको छ । गत महिना भारतीय मौसम विभागले देशले अप्रिलदेखि जुनसम्म चरम गर्मीको सामना गर्ने र मध्य तथा पश्चिमी प्रायद्वीप क्षेत्रहरू सबैभन्दा बढी प्रभावित हुने अनुमान गरेको थियो ।
