विश्वमा हरेक वर्ष सूर्तीजन्य पदार्थ सेवनका कारण ८० लाख मानिसको मृत्यु
-आस्था न्यूज
जेठ १८, २०८१ काठमाडौं ।
आज विश्व सूर्तीजन्य पदार्थ विरुद्धको दिवस ‘सूर्तीजन्य उद्योगको हस्तक्षेपबाट बालबालिकालाई जोगाऔं’ भन्ने नाराका साथ नेपाल विश्वर मनाइदैछ।
विश्वभर नै सूर्तीजन्य पदार्थ सेवनका कारण हरेक वर्ष नसर्ने रोग बढ्दो क्रममा रहेको तथ्याङ्क छ। विश्व स्वास्थ्य संगनका अनुसार विश्वमा हरेक वर्ष सूर्तीजन्य पदार्थ सेवनको कारण ८० लाख मानिसको मृत्यु हुने गरेको छ। चिकित्सकका अनुसार धूम्रपान तथा सूर्तीजन्य पदार्थ सेवन गर्दा क्यान्सर, मुटु रोग, श्वासप्रश्वाससम्बन्धी दीर्घ रोग, मधुमेह जस्ता नसर्ने रोग लाग्ने गर्दछन्।
जनस्वास्थ्यविद् डा. अरुणा उप्रेतीले सूर्तीजन्य पदार्थको सेवन गर्दा मान्छेको शारीरिक मात्रै होइन मानसिक स्वास्थ्यमा पनि धेरै असर गर्ने बताउँछिन् । उनका अनुसार सूर्तीजन्य पदार्थको सेवनले क्षयरोग, फोक्सोको क्यान्सर लगायतका रोग लाग्छन्। मस्तिष्कका नसा पनि संकुचित हुन जान्छन्। यसले गर्दा विभिन्न मानसिक रोग लाग्ने सम्भावना हुन्छ।
त्यस्तै मधुमेह, उच्च रक्तचाप, बढ्ने मुख, दाँत, गिजामा समस्या आउने, उमेर नपुग्दै छाला चाउरी पर्ने सम्भावना हुने, आँखाको दृष्टि कमजोर हुने र श्रवणशक्ति कमजोर हुने जस्ता स्वास्थ्य समस्या देखापर्ने उनले बताइन्। सूर्तीजन्य पदार्थको सेवनले महिलाको प्रजनन स्वास्थ्य लगायत जनस्वास्थ्यका हरेक विषयमा नराम्रो असर पार्ने उनको भनाइ छ।
वरिष्ठ मुटुरोग विशेषज्ञ डा. कमल लम्सालका अनुसार पछिल्लो समय युवा उमेरमा नै मुटुरोग देखिनुको प्रमुख कारण नै सूर्तीजन्य पदार्थको सेवनलाई लिने गरिएको छ। डा. लम्सालले भने, ‘केही वर्ष अगाडिसम्म मुटु रोग भन्ने बित्तिकै ४० वर्ष माथिका उमेर समूहलाई धेरै लाग्ने गथ्र्यो। तर हाल आएर ४० वर्षभन्दा कम उमेरका अर्थात् युवा उमेर समूहलाई पनि मुटुरोग बढ्दै गएको छ। यसको प्रमुख कारण सूर्तीजन्य पदार्थको सेवन हो।
युवा अवस्थामा नै मुटुमा समस्या देखिएर अस्पताल आउने बिरामीसँग कुरा गर्दा उनीहरुले धेरैले चुरोट तथा सूर्तीजन्य पदार्थ सेवन गर्ने गरेको पाइने गरेको उनले बताए। ‘धेरै महिलालाई हृदयाघात हुने गरेको छ। यसको प्रमुख कारण सूर्तीजन्य पदार्थको सेवन नै हो’, उनले भने।
अभिभावकले धूम्रपान तथा सूर्तीजन्य पदार्थ सेवन गर्दा बालबालिका र परिवारका अन्य सदस्यमा श्वासप्रश्वास सम्बन्धी समस्या, मुटु रोग, क्यान्सरलगायतका स्वास्थ्य जोखिम बढाउने उनको भनाइ छ। परिवारमा एक जनाले सूर्ती सेवन गरेको छ भने परिवारका अन्य सदस्यलाई त्यसको असर हुने अनुसन्धानले देखाएको उनले बताए।
