गिरिबन्धु टी स्टेटको फाइल खोल्न गृहमन्त्रीलाई कांग्रेसको चुनौती
-आस्था न्यूज
जेठ २४, २०८१ काठमाडौं ।
नेपाली कांग्रेसले पूर्वप्रधानमन्त्री केपी शर्मा ओली जोडिएको भनिएको झापास्थित गिरिबन्धु टी स्टेटको फाइल खोल्न सरकारलाई चुनौती दिएको छ ।
बिहीबार प्रतिनिधिसभा बैठकको विशेष समयमा बोल्दै कांग्रेस महामन्त्री विश्वप्रकाश शर्माले गिरिबन्धु प्रकरणमा कांग्रेसमाथि विभिन्न आरोप लगाउने प्रयास भएको भन्दै त्यसको फाइल खोल्न गृहमन्त्री रवि लामिछानेलाई चुनौती दिए ।
कांग्रेसले बेचेर ७० बिघा खायो भन्ने एमाले अध्यक्ष ओलीको अभिव्यक्ति प्रमाणित गर्न र आफूहरूलाई दण्डित गर्न उनले गृहमन्त्रीलाई आग्रहसमेत गरे ।
शर्माले गिरीबन्धुको फाइल खोल्ने त परको कुरा यस विषयमा गृहमन्त्री लामिछानेले बोल्नसमेत नसक्ने तर्क गरे ।
उनले गिरीबन्धु बिक्रीबारे एमालेले कांग्रेसमाथि आरोप लगाएपछि त्यसको जवाफ मात्रै दिएको बताएका छन् ।
शर्माले सहकारी प्रकरणमा गठित छानबिन समितिको कार्यादेशमा गृहमन्त्रीको नाम उल्लेख नभए पनि गोर्खा मिडियाको अपचलन भन्ने शब्दले उनीमाथि छानबिन हुने जिकिर गरे ।
देशको प्रधानमन्त्रीले विश्वासको मत लिने क्रममा संख्यातन्त्रको जित भएको र सभामुखले पनि प्रभावकारी भूमिका निर्वाह गर्न नसकेको दाबी शर्माले गरे ।
शर्माले न्यूरोडमा सर्वसाधारणको सुविधाका लागि सडक पेटी बढाउन काठमाडौं महानगरपालिकाले गरेको काम सही रहेको भन्दै संघीय सरकारले हस्तक्षेप गर्न नहुने बताए ।
