यस वर्षको नाडा अटो शो भदौ ११ गतेदेखि राजधानीमा सुरु हुने
-आस्था न्यूज
जेठ ३०, २०८ १ काठमाडौं ।
१६औँ संस्करणको नाडा अटो शो २०२४ आगामी भदौ ११ गतेदेखि राजधानीमा सुरु हुने भएको छ । नाडा अटोमोबाइल एसोसिएसन अफ नेपाल वर्षेनी दशैंतिहारको मुखमा वृहत अटो शो गर्दै आएकोमा यसपटकको अटो शो भदौ ११ गतेदेखि १६ गतेसम्म आयोजना गर्न लागिएको आयोजक नाडाले जानकारी दिएको हो ।
‘नाडा अटो शो २०२४’ घोषणा गर्दै आयोजक नाडाले अटोमा भाग लिने कम्पनीहरूका लागि प्रि-स्टल बुकिङ्ग समेत खुल्ला गरिसकेको छ ।
बुधबार एक सूचना जारी गर्दै नाडाले जेठ ३१ गते बिहीबारदेखि असार ५ गते बुधबारसम्म स्टल बुकिङ्ग खुल्ला गरिने जनाएको छ । सहभागी कम्पनीहरूबाट परेको आवेदनका आधारमा चार पाङ्ग्रे, दुईपाङ्ग्रेसहित कमर्सियल र हेभी इक्युमेन्टका सेग्मेन्टहरुलाई कसरी अटो शोमा व्यवस्थित गर्ने एकिन गरिने अटो शोका संयोजक अनुपकुमार बरालले जानकारी दिए ।
सकेसम्म आएका सबै आवेदन कम्पनीहरूलाई समेट्ने गरी स्टल व्यवस्थापन गरिने बताउँदै संयोजक बरालले प्रदर्शनी मार्ग स्थित भृकुटीमण्डपको पूर्ण हाता नाडाले लिने जानकारी दिए ।
