जंगली च्याउ खाँदा एक सातामै तीन जनाको मृत्यु
-आस्था न्यूज
असार ११, २०८१ काठमाडौं ।
जंगली च्याउ खाएर एक सातामा मकवानपुरको राक्सिराङ र कैलाश गाउँपालिकाका एक बालकसहित ३ जना मृत्यु भएको छ । १६ जना विरामी भएका छन् । ८ जनाको भरतपुर अस्पतालमा उपचार भइरहेको छ ।
आइतबार राक्सिराङ गाउपालिका-७ दुगवाडका ५५ वर्षीय दलबहादुर चेपाङको जंगली च्याउ खाएर मृत्यु भयो । उनका तीन छोराछोरी र पत्नी पनि विरामी भएका छन् । चार जनाको भरतपुर अस्पतालमा उपचार भइरहेको छ ।
यसैगरी कैलाश गाउँपालिका-९ का ४ वर्षिय दिपेश लामाको च्याउ खाएर मृत्यु भएको छ । असार ४ गते च्याउ खाएर सामान्य उपचारपछि थप उपचारका लागि चितवन लगिएको थियो । शनिबार घरतर्फ ल्याउदा बालकको वाटैमा मृत्यु भएको प्रहरीले जनाएको छ ।
यस्तै कैलाश गापा-की २५ वर्षीया निरुमाया रुम्बाको च्याउ खाएर सोमबार मृत्यु भएको छ । असार ३ गते च्याउ खाएर विरामी भएकी रुम्बालाई उपचारका निम्ति हेटौंडा अस्पताल ल्याईएको थियो । थप उपचारका लागि चितवनको सिएमसी अस्पतालमा लगिएको थियो । विरामीका आफन्तले उपचार खर्च तिर्न नसक्ने भनी आइतबार पुनस् हेटौंडा अस्पतालमा ल्याएर उपचार गर्ने क्रममा सोमबार मृत्यु भएको जिल्ला प्रहरी कार्यालय मकवानपुरले जनाएको छ ।
यसैगरी मकवानपुर गढीमा गत शुक्रबार जंगली च्याउ खाएर ८ जना विरामी परेका थिए । हेटौंडा अस्पताल उपचारपश्चात उनीहरु घर फर्किसकेका छन् । यसैगरी कैलाश गापा-(८ गाल्वाङमा जंगली च्याउ खाएर एकै परिवारका चार जना विरामी परेका छन् ।
