कुकुर कुटेको आरोपमा एक जना पक्राउ
-आस्था न्यूज
असार १४, २०८१ काठमाडौं ।
काठमाडौंको कीर्तिपुरमा कुकुर कुटेको आरोपमा एक जना पक्राउ परेका छन्।
बिहीबार कीर्तिपुर नगरपालिका वडा नम्बर ५ पांगामा सामुदायिक कुकुरलाई निर्मम तरिकाले कुटेको आरोपमा प्रहरीले एक जनालाई पक्राउ गरेको जिल्ला प्रहरी परिसर काठमाडौंका एसपी नवराज अधिकारीले जनाएको छ।
कुकुरलाई निर्मम तरिकाले कुटेको भन्दै पशु कल्याण संस्था स्नेहाज केयरले प्रहरी वृत्त कीर्तिपुरमा जाहेरी दिएको थियो। उक्त जाहेरीपछि बिहीबार नै प्रहरीले पांगा बस्ने सुरेश महर्जनलाई पक्राउ गरेको छ।
प्रहरीले घटना सम्बन्धमा प्रहरी वृत्त कीर्तिपुरले अनुसन्धान अघि बढाएको छ। घाइते कुकुर कल्याणको संरक्षणमा रहेको प्रहरीले जनाएको छ। घाइते कुकुरको आँखामा गम्भीर चोट लागेको छ।
यसअघि इलाममा क्रूरतापूर्वक कुकुर मारेको आरोपमा जिल्ला प्रहरी कार्यालयले तीन जनालाई पक्राउ गरेको थियो।
