सामाजिक सञ्जालमार्फत पुरुषसँग सम्पर्क बढाउने र रकम बार्गेनिङ गर्ने पक्राउ
-आस्था न्यूज
असार २८, २०८१ काठमाडौं ।
हनी ट्रयापमा संलग्न २ जनालाई प्रहरीले पक्राउ गरेको छ । आपराधिक लाभ लिने उद्देश्यले योजनाबद्ध तवरले सामाजिक सञ्जालमार्फत पुरुषसँग सम्पर्क बढाउने र त्यसपछि बार्गेनिङ गरेर रकम असुल्ने कार्यमा संलग्न दुई जनालाई प्रहरीले पक्राउ गरेको हो ।
पीडितले काठमाडौँ उपत्यका अपराध अनुसन्धान कार्यालयमा दिएको उजुरीका आधारमा सिन्धुपाल्चोकका तेन्जी डोमा छिरिङ भनिने सिर्जना तामाङ र सौरभ तामाङ भन्ने लिला बहादुर तामाङलाई राजधानीको बौद्धबाट पक्राउ गरेको हो ।
प्रहरी अनुसन्धानका क्रममा लिला बहादुर तामाङले पीडितको फेसबुक आइडी सिर्जना तामाङको ह्वाट्स एपमा पठाई साथी बन्न लगाएको र फेसबुक मेसेन्जरबाट सिर्जना तामाङले पीडितसँग कुरा गरी भेट्नलाई आफ्नो कोठामा बोलाएको खुलेको छ ।
यस्तै पीडित कोठामा आउन मन्जुर भएपछि लिला बहादुर तामाङले पीडितसँगको भिडियो बनाउने प्रयोजनको लागि सिर्जना तामाङलाई आफ्नो मोबाइल दिएको पनि खुलेको छ ।
त्यसपछि सौरभले दिएको मोबाइलबाट सिर्जनाले आफ्नो र पीडितको अश्लील भिडियो बनाई उक्त मोबाइल सौरभलाई फिर्ता गरेको पाइएको छ । त्यसपछि उक्त भिडियो सिर्जना र सौरभले पीडितलाई पठाई सुरुमा पीडितसँग १ करोडको बार्गेनिङ गरेको खुलेको छ । यस्तै पछि १५ लाखमा कुरा मिलाएको प्रहरी अनुसन्धानबाट खुलेको छ । आफू यसरी ठगिएपछि पीडित प्रहरीमा पुगेका थिए ।
