खप्तड गोल्डकपको आय व्यय सार्वजनिक
धनगढीमा गत साता सम्पन्न दोस्रो संस्करणको नेपाल आईस सुदुरपश्चिम खप्तड गोल्डकप फुटबलमा आयोजक घाटामा गएको छ । आयोजक सुदुरपश्चिम ११ स्पोर्टस क्लबले मंगलबार सार्वजनिक गरेको प्रतियोगिताको आय व्ययमा क्लब घाटामा गएको देखिएको हो ।
दोस्रो संस्करणबाट १ लाख ६५ हजार भन्दा बढी रकम घाटा भएको आयोजकले जनाएको छ । प्रतियोगितामा साढे ९१ लाख रकम खर्च भएकोमा १ लाख ६५ हजार ५१६ रुपैया घाटा भएको क्लबका महासचिव प्रकाश शाहीले जानकारी दिए ।
आयोजकले विभिन्न ३७ वटा शिर्षकमा आम्दानी भएकोमा २१ वटा शिर्षकमा रकम खर्च भएको जनाएको छ । मुख्य प्रायोजक सिजि ग्रुपले २० लाख रकम दिएकोमा १९ लाख टिकटबाट उठेको थियो । सहप्रायोजक नेपाल टेलीकम र जगदम्वा स्टिलले ४/४ लाख रकम दिएकोमा विभिन्न व्यापारिक प्रतिष्ठान र संघ संस्थाहरुवाट पनि गोल्डकप आयोजना गर्नका लागि सहयोग भएको आयोजकले जनाएको छ ।
आयोजकले खर्च तर्फ सवैभन्दा बढी टिम व्यवस्थापनमा भएको जनाएको छ । सहभागी टोलीको लागि साढे ३३ लाख रकम खर्च भएको जनाएको छ । त्यस्तै पुरस्कार खर्च २२ लाख भएको आयोजकले कार्यक्रममा जानकारी दिएको छ ।
