फिल्म

चैत्र ३१,२०७३

-

काठमाडौं, चैत ३१ –

बहुप्रतिष्ठित फिल्म प्रेम गीतको सिक्वेल 'प्रेम गीत-२' ले आफ्नो शीर्ष गीत सार्वजनिक गरेको छ ।

सार्वजनिक 'कहानी यो प्रेम गीतको' बोलको गीतमा कल्याण सिंहको संगीत रहेको छ।

नयाँ वर्षको अवसर पारेर उक्त गीत रिलिज गरिएको हो ।

बुधवार सार्वजनिक उक्त गीतको भिडीयोलाई करीब ५ लाखले हेरी भ्याएका छन् ।

रोहित जोन क्षेत्री र श्रेया सोताङ्गको स्वर रहेको उक्त गीतको भिडियोमा प्रदिप खड्का र आश्लेसा ठकुरीको अभिनय छ।

चर्चित रक ब्यान्ड १९७४ एडीका लिड भोकलिस्ट समेत रहेका क्षेत्रीको यो पहिलो पाश्र्व गायन हो ।

रेनशा वान्तवा राईले यस भिडियोका लागि नृत्य निर्देशन गरेकी हुन्।

अमृत मरहठ्ठाद्धारा लिखित शब्दमा प्रेमको मीठास महसुस गर्न सकिन्छ ।

'प्रेम गीत-२' अघिल्लो वर्ष संगीतकै कारण चर्चामा आएको 'प्रेम गीत'को सिक्वेल हो ।

थाइल्यान्डको मनोरम समुन्द्री तट, गुफा, तलैया र नदीलाई गीतमा छायाँकन गरिएको छ ।

नेपाल तथा नेपाल बाहिरका देशहरुमा खिचिएको फिल्ममा २ करोडभन्दा बढीको लागानी लागेको निर्माता सेन बताउँछन्।

फिल्ममा 'प्रेम गीत' बाट चर्चामा आएका नायक प्रदिप खड्का, नवनायिका आश्लेशा ठकुरी, शिशिर भण्डारी, श्रद्धा प्रसाई, कैलाश कट्वाल लगायतको अभिनय छ।

नेपाल र म्यानमारका दुई पात्र बीचको प्रेम, संघर्ष चित्रण गरिएको चलचित्र साउन १३ गते रिलिज हुनेछ ।