कीर्तिमान रच्दै म्यान्चेस्टर सिटी

बैशाख ३१,२०७५

३१ बैशाख , २०७५

इंग्लिस प्रिमियर लिगको अन्तिम खेलमा जित निकाल्दै म्यान्चेस्टर सिटीले एक सय अंक बनाउने टिमको रेकर्ड बनाएको छ ।

आइतबार रातिको संघर्षपूर्ण खेलमा साउथह्याम्टनलाई १–० ले हराएपछि सिटीले एकै सिजन १०६ गोल र १०० अंकको कीर्तिमान बनाएको हो ।

म्यान्चेस्टर सिटीलाई जिताउन खेलको इन्जुरी समयमा ग्याब्रिएल जिससले गोल गरेपछि उक्त कीर्तिमान बनेको हो ।

एक खेलबाँकी हुँदा ९७ अंक बनाएर यसअघि चेल्सीले एकै सिजनमा बनाएको सर्वाधिक ९५ अंकको कीर्तिमान भंग गरेको म्यानचेस्टर सिटी सिजनमा १०० अंक बनाउने पहिलो टिम बनेको छ ।

निर्धारित ९० मिनेटसम्म पनि कतै बाट गोल हुन नसकेको खेलमा इन्जुरी समयको अन्तिम मिनेटमा जिससले गोल गरे ।

सिटीले यो सिजन बनाएको १०० अंक मध्ये ५० अंक घरेलु मैदानमा भएका खेलबाट जोडेको हो भने ५० अंक उसले अवे गेममा जितेको हो ।

दुई खेल मात्र हारेको सिटीले यो सिजन ३२ खेलमा जित र चार खेलमा बराबरीको नतिजा निकाल्यो । सिजनभर १०६ गोल गरेको सिटीले २७ गोल खाएको छ ।