-

वैशाख ११ –

नम्रता श्रेष्ठ र कोशिश क्षेत्रीको प्रमुख भुमिका रहेको फिल्म 'पर्व' को अफिसियल ट्रेलर सार्वजनिक भएको छ ।

आइतबार राजधानीमा एक कार्यक्रमका बीच कम्पनी सुवास इन्टरटेन्मेन्ट र टिभी फिल्मीले 'पर्व' को ट्रेलरसँगै मोसन पोस्टर पनि सार्वजनिक गरेको हो ।

थ्रिलर हरर  जनरामा निर्माण भएको फिल्मको ट्रेलरमा नायक कोशिश क्षेत्री लेखकको भूमिकामा देखिएका छन् भने नम्रता श्रेष्ठलाई मानसिक रोगीको भूमिकामा देख्न सकिन्छ ।

नम्रता श्रेष्ठ, कोशिश क्षेत्री, माला लिम्बु, जेबिका कार्की लगायतका कलाकारको मुख्य भूमिका रहेको चलचित्रको ‘काले दाई काले दाइ’ बोलको गीतको भिडियो अहिले सर्वाधिक चर्चित छ ।

'मोक्ष' फिल्मबाट नेपाली रजतपटमा भित्रिएका नायक कोशिश क्षेत्री र यसअघि नै दर्जनौ सफल फिल्म दिइसकेकी नायिका नम्रता श्रेष्ठले पहिलो पटक 'पर्व' मार्फत एकसाथ स्क्रिन शेयर गरेका हुन् ।

चलचित्रमा राजेश श्रेष्ठको छायांकन, नायक कोशिश क्षेत्रीकै कथा, सुरेन्द्र पौडेलको सम्पादन, किरण माइकलको पटकथा तथा संवाद, कविराज गहतराजको नृत्य निर्देशन, हिमाल केसीको एक्सन छ ।

'पर्व' का निर्देशक दिनेश राउत हुन् ।

‘पर्व’को विषयमा बोल्दै निर्देशक दिनेश राउतले भने, 'पहिलो पटक थ्रीलर, सस्पेन्स र हरर फिल्म  निर्देशन गरेको छु । सुरुमा त म गर्न सक्छु जस्तो लागेको थिएन तर लभस्टोरी फिल्म भएपनि हरर फिल्म भएपनि फिल्म त फिल्म नै हो । मात्र जनरा फरक हो । अब मैले कस्तो काम गरेको छु भन्ने  थाहा पाउन त 'पर्व' हलमा लागेपछि मात्र थाहा होला ।'

दिनेशले यस अगाडि ‘आइ एम सरी, नोभेम्बर रेन, क्लासिक’ जस्ता फिल्म निर्देशन गरिसकेका छन् ।

अभिनेत्री नम्रता श्रेष्ठले चलचित्र राम्रो कथामा बनेको बताइन् ।

गोपिकृष्ण टीभीको निर्माणमा सुवास इन्टरटेन्मेन्टको प्रस्तुती रहेको फिल्म ‘पर्व’ जेठ १२ गतेबाट रिलिज हुँदैछ ।