पुनःर्निर्माण

बैशाख १२,२०७४

-

१२,वैशाख भक्तपुर:

 राष्ट्रपति विद्यादेवी भण्डारीले भक्तपुर क्षेत्रको अवलोकन गर्नुभएको छI भूकम्प गएको दुई वर्ष पूरा भएको दिन पारेर राष्ट्रपति भण्डारीले भक्तपुर दरबार क्षेत्रमा भइरहेको सम्पदाहरुको पुनर्निर्माण कार्यको स्थलगत अवलोकन भ्रमण गर्नुभएको हो।

राष्ट्रपति भण्डारीलाई २०७२ साल वैशाख १२ गतेको भूकम्पले भत्काएर अहिले पुनःर्निर्माण अन्तिम चरणमा पुगेको भक्तपुर दरबार क्षेत्र प्रवेश गर्ने प्रमुख प्रवेशद्वार खौमागेटमा स्वागत गरिएको थियो।उहाँलाई पुरातत्व विभागका महानिर्देशक भेषनारायण दाहाल, भक्तपुरका प्रमुख जिल्ला अधिकारी द्रोण पोखरेल, भक्तपुर नगरपालिकाका कार्यकारी अधिृकत रोहितराज पोखरेल, स्मारक संरक्षण तथा दरबार हेरचाह कार्यालय भक्तपुरका प्रमुख मंगला प्रधानलगायतले स्वागत गर्नुभएको थियो।

त्यसैगरी राष्ट्रपति भण्डारी स्वागत गरिएको खौमा गेटदेखि भक्तपुर दरबार क्षेत्रस्थित चार धाम परिसरबाट भूकम्पले क्षति पुर्‍याएर पुनर्निर्माण भइरहेको सम्पदाहरुको अवलोकन भ्रमण गर्नुभएको थियो। जसमध्ये चार धाम परिसरमा रामेश्वर र जगन्नाथ मन्दिरको पुनर्निर्माण सम्पन्न भइसकेका छन्।

त्यस्तै भक्तपुर दरबार क्षेत्र परिसरमा पुनर्निर्माण भइरहेको केदारनाथको मन्दिर, सिंहध्वाका दरबारको उत्तर पश्चिमस्थित राष्ट्रिय कला संग्रहालयको पनि राष्ट्रपति भण्डारीले अवलोकनसँगै पुनर्निर्माण कार्यको जानकारी लिनुभएको थियो।भूकम्पले चर्काएर  टेको लगाइएको सिंहध्वाका दरबारको सामुन्ने भएर राष्ट्रपति भण्डारीले स्वर्णद्वार, भूपतीन्द्र मल्लको सालिक, पचपन्न झ्याल दरबार, च्यासिंमण्डप हुँदै सिद्धिलक्ष्मी मन्दिर, सिलु महादेव मन्दिर र तवः सत्तल पुनर्निर्माण कार्यको अवलोकन गर्नुभएको थियो।

यसका साथै तवः सत्तल पुनर्निर्माणस्थलसम्म पैदलै हिँड्नुभएका राष्ट्रपति भण्डारी त्यहाँबाट यक्षेश्वर महादेव मन्दिर घुम्दै भूकम्पले भत्काएर पुनर्निर्माण सम्पन्न भइसकेको हरिशंकर नारायण मन्दिर र पुननिर्माण हुँदै गरेको वत्सला मन्दिर अवलोकन गरेर पैदल नै खौमागेट फर्कनुभएको थियो।

सो अवसरमा राष्ट्रपति भण्डारीसमक्ष सम्पदा पुनर्निर्माण कार्यबारे पुरातत्व विभागका महानिर्देशक भेषनारायण दाहाल, भक्तपुर नगरपालिकाका कार्यकारी अधिकृत रोहितराज पोखरेल, स्मारक संरक्षण तथा दरबार हेरचाह कार्यालयका प्रमुख मंगल प्रधान र प्रमुख इञ्जिनियर मोहनकृष्ण श्रेष्ठले बिफ्रिङ गर्नुभएको थियो।

उहाँहरुले भक्तपुरमा पुरातत्व विभाग र भक्तपुर नगरपालिकासँगै स्थानीय समुदायको सक्रियतामा मौलिक स्वरुपमा तीव्र गतिमा सम्पदा पुनर्निर्माण कार्य भइरहेको जानकारी गराउनुभएको थियो।

भक्तपुर दरबार क्षेत्रमा ६ वटा सम्पदाको पुनर्निर्माण सम्पन्न भएको छ  जसमध्ये तीन वटा पुरातत्व विभाग र तीनवटा भक्तपुर नगरपालिकामार्फत काम भएको हो।

२०७२ वैशाख १२ भूकम्प र त्यसपछिका पराकम्पले भक्तपुरका २० वटा सम्पदालाई पूर्ण रुपमा क्षति पुर्‍याएको थियो। त्यस्तै ४३ वटा सम्पदामा आंशिक क्षति पुगेको भक्तपुर नगरपालिकाले जनाएको छ।