जेठ २५,२०७५

-

२५ जेठ , २०७५

अफगानिस्तानले बंगलादेशसँगको तीन टि-२० खेलको सिरिज कब्जा गरेको छ ।

देहरादूनमा भएको सिरिजको अन्तिम खेलमा बंगलादेशलाई १ रनले हराउँदै अफगानिस्तानले सिरिजमा ३ - ० को जित हात पारेको हो ।

हिजो भएको अन्तिम खेलमा टस जितेर पहिले ब्याटिङ गरेको अफगानिस्तानले निर्धारित २० ओभरमा ६ विकेट गुमाएर १४५ रन बनायो । अफगानिस्तानका लागि समिमुलाह सेनवारीले अविजित  ३३ रन बनाए । तेस्तै  असगर स्टानिकजाईले २७ तथा मोहम्मद सहजातले २६ रन जोडे ।

बंगलादेशका नाजमुल इस्लाम र अबु जयादले समान दुई विकेट लिए ।

१४६ रनको लक्ष्य पछ्याएको बंगलादेशले २० ओभरमा ६ विकेट गुमाउँदै १४४ रन मात्र बनाउन सक्दा खेल १ रनको झिनो अन्तरले अफगानिस्तानलाई सुम्पिनु पर्यो । बंगलादेशका लागि मुजफिकर रहिमले ४६ तथा महमुद्लाहले ४५ रन हाने टिमको पनि हार भने टार्न सकेनन् ।

अफगानिस्तानका मुजिव उर रहमान, करिम जनत र राशिद खानले १-१ विकेट लिए । बंगलादेशका तीन खेलाडी भने रन आउट भएका थिए ।

यो रोमाञ्चक जितसँगै अफगानिस्तानले बंगलादेशमाथिको पहिलो टी-ट्वान्टी सिरिजमा क्लिन  स्वीप गरेको छ । यसअघि अफगानिस्तानले पहिलो खेलमा बंगलादेशलाई ४५ रनले हराएको थियो भने दोस्रो खेल ६ विकेटले जितेको थियो ।

तीन खेलमा ८ विकेट लिएका राशिद खान प्रतियोगिताको म्यान अफ दि सिरिज भए ।