कोरोनाबाट बच्न खोप कार्यक्रमलाई प्राथमिकता दिनुपर्नेमा जोड
-आस्था न्यूज
भदौं १६, २०७८ काठमाडौं ।
विश्व स्वास्थ्य सङ्गठनले कोरोनाबाट बच्न खोप कार्यक्रमलाई प्राथमिकता दिनुपर्नेमा जोड दिएको छ । नेपालमा भइरहेको खोप कार्यक्रम प्रभावकारी रहेकोसमेत डब्लूएचओको निचोड छ ।
स्वास्थ्य सङ्गठनका नेपाल प्रमुख डा. राजेश सम्भाजिरो पाण्डेले प्रभावकारी खोप कार्यक्रमले मात्रै कोभिड–१९ परास्त गर्न सकिने भएकाले नेपालले खोपलाई प्राथमिकता दिनुपर्ने बताउनुभयो ।
स्वास्थ्य पत्रकार मञ्च नेपालद्वारा मङ्गलबार आयोजित अन्तरक्रियामा उहाँले डब्लूएचओका ९५ प्रतिशत काम स्वास्थ्य तथा जनसङ्ख्या मन्त्रालयसँगको समन्वयनमा हुने गरेको चर्चा गर्दै कोरोना नियन्त्रणका लागि पनि नेपाल सरकारसँग मिलेर काम गरिरहेको बताउनुभयो ।
उहाँले विश्व स्वास्थ्य सङ्गठनले तेस्रो मात्रा खोप लगाउन सिफारिस नगरेको स्पष्ट गर्दै भन्नुभयो, “पूर्ण खोप सबैले पाउनुपर्छ भन्ने पहिलो प्राथमिकता हो । कोभिड–१९ नयाँ रोग भएकाले यसबारे अध्ययन भइरहेको छ । गर्भवती महिलालाई पनि तेस्रो डोज खोप लगाउनुपर्ने आवश्यकता छ छैन, त्यसको जवाफ अझै आइसकेको छैन ।”
डब्लूएचओका अनुसार विश्वमा पाँच अर्ब मानिसले कोरोनाविरुद्धको पहिलो खोप लगाइसकेका छन् । तीमध्ये न्यून आय भएका देशका एक दशमलव ६ प्रतिशत जनसङ्ख्याले मात्रै खोप लगाउन पाएका छन् । उहाँले सबै नागरिकले पूर्ण खोप लगाउनुपर्छ भन्ने सङ्गठनको धारणा रहेको बताउनुभयो ।
सङ्गठनका नेपालस्थित खोप कार्यक्रम प्रमुख डा। विनोद बुराले कोरोनाविरुद्धको पहिलो खोपमा समानता हुनुपर्नेमा जोड दिनुभयो । उहाँले खोपमा समानता नभइरहेको अवस्थामा सबैलाई खोपको पहुँचमा पु¥याउनुपर्ने आवश्यकता रहेको बताउनुभयो ।
उहाँका अनुसार २०२१ को अन्त्यसम्म न्यून आय भएका देशमा १० प्रतिशत जनसङ्ख्यालाई खोप लगाउने योजना रहेको छ । डब्लूएचओका प्रतिनिधि डा. एलिलसन गोकोटानोले नसर्ने कोरोनाको प्रकोप बढ्दै गइरहेको बताउनुभयो । यद्यपि, विश्वमा ६६ प्रतिशत मृत्यु नसर्ने रोगको कारणबाट हुने गरेको उहाँको भनाइ छ ।
नेपालमा हालसम्म ५३ लाखभन्दा बढीले पहिलो मात्रा खोप पाइसकेका छन् भने ४४ लाखले दुवै मात्रा लगाइसकेका छन् । हालसम्म विश्वमा २१ करोड ७० लाख मानिस सङ्क्रमित भइसकेका छन् । गोखापत्रमा खबर छ ।
