ग्यास सस्तिएपछि ग्रामिण क्षेत्रमा पनि प्रयोगकर्ता बढे
-आस्था न्यूज
फागुन २६, २०७८ काठमाडौं ।
सुरुमा मूल्य महँगो हुँदा सीमित घरधुरीले प्रयोग गर्ने खाना पकाउने ग्यासको मूल्य अहिले सस्तिएको छ । पहिलेभन्दा आधा मूल्य सस्तो भएपछि हुम्लामा ग्यास प्रयोग गर्नेको सङ्ख्या पनि उल्लेख्य वृद्धि भएको छ । यसअघि प्रतिसिलिन्डर करिब १४ हजार रुपियाँ पर्ने ग्यास अहिले छ हजार रुपियाँमै पाइन्छ । कर्णाली कोरिडोर हुम्लाको सलीसल्लासम्म जोडिएपछि ग्यासको मूल्य सस्तिएको हो ।
स्थानीय गृहिणी सुशीला रोकायाले ग्यास प्रयोग गर्नेको सङ्ख्या बढ्दै गएको बताउनुभयो । उहाँले आफूले ग्यासको मूल्य प्रतिसिलिन्डर साढे छ हजार रुपियाँमा गाउँमै पाउन थालेपछि जडान गरेको जानकारी दिनुभयो । उहाँले सुरुका दिनमा आंँैलामा गन्न सकिने परिवारले मात्र ग्यास चुलो प्रयोग गर्दै आएकोमा अहिले त्यो सङ्ख्या ५० प्रतिशतले बढेको बताउनुभयो । सुरुमा ५० परिवार रहेकोमा अहिले तीन सय परिवारले ग्यास चुलो प्रयोग गरिरहेका बताउनुभयो ।
ग्यास खरिद गर्नेको सङ्ख्यासमेत वृद्धि भइरहेको ग्यास बिक्रेताले जनाएका छन् । पहिलो पटक ग्यास प्रयोग गर्नेले प्रतिसिलिन्डर साढे १४ हजार रुपियाँसम्म तिर्नु परेकोमा अहिले साढे छ हजार रुपियाँ मूल्य रहेको छ ।ग्यास व्यापारी लोकेन्द्र शाहीले कर्णाली कोरिडोर हुम्लाको सलीसल्लासम्म जोडिएपछि ग्यासको मूल्य सस्तिएको बताउनुभयो । पहिले मुगुको गमगढीबाट खच्चडमा चार पैदल ढुवानी गरेर ल्याउनुपर्दा महँगो पर्ने गरेको बताउँदै उहाँले अहिले कम लागत आउन थालेपछि मूल्य घटेको जनाउनुभयो ।
उहाँले अझै सलीसल्लामा कर्णाली नदीमाथि पुलको व्यवस्था हुन सके यातायात दुल्लीकुनासम्म आउने हुँदा अहिलेको मूल्यबाट पनि आधा कम हुने जानकारी दिनुभयो । सदरमुकाम सिमकोटभन्दा दक्षिणी क्षेत्रका गाउँपालिकाका सडकले जोडिएका बस्तीमा चार हजार पाँच सयमा ग्यास पाउने गरेको छ । मूल्य घटेपछि ग्यास व्यापारीको सङ्ख्या पनि वृद्धि भएको छ । हुम्लामा सुरुमा ग्यास प्रयोगकर्ता दुई जना व्यापारी भएकोमा अहिले त्यो सङ्ख्या १२ भन्दा बढी रहेको छ । गोरखापत्रमा खबर छ ।
