सरकार छोड्ने डा.बाबुराम भट्टराईको प्रस्ताव !
-
कार्तिक २८,२०७६ काठमाडौं।
समाजवादी पार्टीका अध्यक्ष डा.बाबुराम भट्टराईले सरकार छाड्ने प्रस्ताव गरेका छन । समाजवादी पार्टीको बिहिबार बसेको संघीय परिषद्को बैठकमा अध्यक्ष भट्टराईले सो प्रस्ताव गरेका हुन् ।
सरकारको नेतृत्व गर्ने पार्टी (नेकपा) ले एकातर्फ संविधान संशोधन गर्न कुनै चासो नदेखाएको र अर्कोतर्फ प्रदेश प्रमुखहरुलाई एकलौटी निर्णय गरेर हटाउने जस्ता काम गरिरहेको आरोप लगाउँदै सरकारमा बस्नुको औचित्य नभएको भन्दै बैठकमा कार्यपत्र प्रस्तुत गरेका थिए ।
अध्यक्ष भट्टराईले सरकारको नेतृत्व गर्ने दलले सत्ता साझेदार दलसँग महत्वपूर्ण निर्णय लिँदा सरसल्लाह गर्नुपर्ने सत्ता सञ्चालनको सामान्य मर्यादाको समेत ख्याल नगरेको आरोप समेत लगाए ।
उनले कार्यपत्रमा संघीय सरकारमा पार्टीको संलग्नताबारे गम्भीर समीक्षा गर्नुपर्ने जरुरी रहेको बताउँदै यस सन्दर्भमा सरकार र सरकार सम्बद्ध पार्टीसँग वार्ता अगाडि बढाउने, २ बुँदे सहमति अनुरुप संविधान संशोधनका लागि संशोधनको प्रकृया अगाडि बढाउन पहल गर्ने उल्लेख गरेका छन् ।
संविधान संशोधनको प्रकृयालाई अगाडि बढाउन पहल गरेपछि पनि त्यसको कुनै सुनुवाई नभए सरकारबाट बहिर्गगमनको लागि पार्टीको कार्यकारिणी समितिले निर्णय गर्ने गरी पार्टी अगाडि बनुपर्ने उनले सुझाव दिएका छन् ।
परिषद्को बैठक सम्पन्न भएपछि कात्तिक २९ र ३० गते केन्द्रीय समितिको बैठक बस्ने छ । बैठकमा सरकार छाड्ने/नछाड्ने विषयमा गम्भीर छलफल हुने प्रचार विभाग प्रमुख प्रशान्त सिंहले बताए । सरकार छाड्नका लागि पार्टीभित्र र बाहिर दवाव आइरहेको छ ।
